O Concello de Tui anunciou este luns a adopción de varias medidas para “garantir a atención á cidadanía e a continuidade da tramitación administrativa”, despois de detectarse tres casos positivos de COVID-19 no seu persoal.
Segundo informou o consistorio tudense, a situación de nivel 3 de alerta (Tui está coloreada en vermello no mapa de incidencia do COVID-19 que publica cada día o Sergas), sumada ao incremento de casos activos e á detección dese tres positivos no Concello, levaron a tomar unha serie de medidas.
Así, activaranse quendas rotatorias entre o persoal municipal para que, se se contaxia algún traballador, non haxa que pechar un departamento enteiro, como ocorreu desde o pasado venres con Servizos Sociais. Deste xeito, garántese que o 50 por cento do persoal de cada servizo está activo.
Por outra banda, volverase activar a cita previa para todos os trámites en todos os departamentos, incluído o rexistro de entrada, que se poderá solicitar telefonicamente, por correo electrónico ou a través da sede electrónica.
Así mesmo, suspenderase o servizo de recollida de voluminosos xa que, en moitos casos, a recollida implica que os traballadores deben entrar nos domicilios dos veciños para retirar o material.
Finalmente, o Concello de Tui confirmou que, a partir deste martes, realizará test de antíxenos a todo o persoal municipal.