Axentes da Policía Local de Vigo detiveron a un veciño da cidade, S.L.T.C., de 58 anos de idade e natural de Perú, como presunto autor dun delito de violencia de xénero, tras agredir a unha muller na vía pública.

Segundo informaron fontes policiais, os feitos ocorreron na madrugada do pasado sábado, cando os empregados dun local da zona de Churruca chamaron ao 092 para alertar de que un home estaba a agredir a unha muller na rúa.

Cando os axentes chegaron observaron a unha parella discutindo e, tras separalos, entrevistáronse coa muller, que negou ser agredida. No entanto, os policías observaron que presentaba un derrame nun ollo, pero a vítima declinou recibir asistencia sanitaria.

Así mesmo, os funcionarios solicitaron o testemuño dos traballadores do local que chamaran ao 092. Estes explicaron que escoitaran berros e, ao asomarse á rúa, comprobaron como un home losqueaba a unha muller, á que tirou ao chan, e logo arrastrouna varios metros.

En virtude deste relato e, comprobada a lesión da muller, os axentes procederon á detención do sospeitoso por un suposto delito de violencia de xénero.