A concentración e a andaina polos arredores da residencia DomusVi Barreiro, foi convocada polas asociacións de familiares dos xeriátricos de DomusVi en Vigo (ASFAREBA) e en Cangas (Vellez Digna), co apoio da federación galega de familiares REDE e da asociación de familiares da residencia pública de Bembrive tamén de Vigo.
Durante a concentración pedíronse outra vez explicacións e transparencia sobre o acontecido dentro das residencias desde que comezou a pandemia de COVID-19. Así, reclamaron a creación dunha Comisión de Investigación sobre as residencias no Parlamento de Galicia. Esta Comisión xa fora demandada a pasada semana.
A residencia de DomusVi en Barreiro, xunto coa de Aldán en Cangas, foran as primeiras grandes residencias de Galicia onde se comezaron a rexistrar focos importantes de contaxio. Desta maneira, considerouse a área de Vigo como a ‘zona cero’ da pandemia en marzo pasado.
Xa o 17 dese mesmo mes, a federación REDE solicitara a intervención pública destas residencias, que se producíu 13 días despois, o 30 de marzo. Desta maneira, os centros de DomusVi en Barreiro e Aldán foron as dúas primeiras residencias intervidas no Estado español.
A Xunta de Galicia xustificou a acción como “o xeito de garantir a saúde e a vida dos anciáns residentes”. Segundo as asociacións convocantes da concentración “hoxe, 30 de agosto, vai para cinco meses desa intervención”, aínda así “o virus e a xestión da pandemia deixaron un saldo nestas dúas residencias de 85 persoas maiores e dependentes falecidas, 47 en Barreiro, 38 en Aldán”. A estas cifras hai que sumar as arredor de 200 usuarias e traballadoras afectadas pola infección.
As organizacións convocantes quixeron chamar a atención sobre a incerteza en que viven as familias das persoas maiores ingresadas en residencias galegas. Consideran que de novo o perigo ameaza estes centros “pola nula corrección de erros que se observa nos xeriátricos para evitar que a pandemia se propague de novo”. Insisten ademais sobre a sistemática falla de persoal e de elementos de protección, subliñou Paulino Campos, presidente de REDE.
Por outra parte, a inquedanza dos familiares aumentou tamén polo “incremento de medidas de restrición nas visitas dos familiares, con vulneracións reiteradas de nomativas, cando non se produce o feche irregular das instalacións”. Ante esta situación, denuncian que as familias e as usuarias, quedan desamparadas “nuns actos que están máis preto do secuestro de persoas que de medidas proporcionadas a realidades epidemiolóxicas”.
Por último, denuncian que as empresas e a administración “non fixeron os deberes, que é, basicamente, garantir un número apropiado de persoal, formado e informado, nas residencias, fundamental para a contención do coronavirus”. Neste sentido, “estamos nunha situación peor que na previa da pandemia de marzo, estamos nas portas doutra hecatombe”.
Tanto familiares como traballadoras anunciaron novas mobilizacións durante o mes de setembro. O 3 diante da sede central estatal de DomusVi, en Vigo, o 6, 13 e 20 en vilas do Morrazo, o 11 na praza maior de Celanova, o 25 nas rúas de Vigo e o 26 na Praza da Quintana, en Santiago de Compostela.
