Dous das residencias máis importantes en Galicia, a pública máis grande (en Bembrive, Vigo, de 306 prazas) e a privada de Barreiro (tamén en Vigo), propiedade de DomusVi, decidiron nestas últimas horas permitir o acceso dos familiares só unha vez á semana e nun espazo de 30 minutos. Unha situación que, segundo a asociación de familiares REDE, vai en contra da orde aprobada entre o Goberno central e as autonomías.

Este acordo suliñaba que se restrinxirán as visitas nos centros de maiores a unha por residente e máximo dunha hora ao día, “extremando as medidas de prevención”. A decisión destas dúas residencias viguesas provocou indignación nas familias e nas usuarias.

De feito, representantes das persoas maiores residentes na pública de Bembrive presentaron unha ducia de reclamacións nas dependencias deste centro entre este luns e e martes. Tamén se concentraron ante as portas do xeriátrico como sinal de protesta e ameazan con ir directamente aos xulgados se a dirección da residencia persiste en manter as restricións “extremas”.

Os familiares piden ao Goberno central que apreme á Xunta para que poña coto a este incumprimento das normas aprobadas por unanimidade por todos os Gobernos, central e autonómicos, “un feito gravísimo”, advirten. Por iso, ameazan con acudir aos xulgados para denunciar ás residencias por “vulnerar os dereitos fundamentais de residentes e familiares”, e á Xunta por “complicidade neglixente”