Investigadores da Universidade de Vigo (UVigo) traballan xunto ao Sergas e o Consejo Superior de Investigaciones Científicas (CSIC) nun proxecto para desenvolver un test que permita a identificación ultrasensible do SARS-CoV-2 no momento da atención ao paciente.

Esta iniciativa enmárcase na convocatoria Fondos Supera Covid e, segundo explicou o investigador do grupo de Química Coidal que a lidera, Jorge Pérez-Juste, o test no que se traballa facilitaría “detectar cantidades de virus máis baixas, o que, á súa vez, permitirá detectalo antes”.

Así, a universidade detallou que se busca dar resposta á necesidade de desenvolver ferramentas diagnósticas novas e fiables, xa que o diagnóstico precoz do virus permite mellorar as posibilidades de supervivencia dos pacientes e garantir a seguridade da cidadanía.

Neste sentido, apuntou que a maior parte dos tests inmunolóxicos para o coronavirus perciben anticorpos provocados durante a infección, o que leva que estes se detecten entre catro e dez días despois do contaxio.

Mentres, este novo proxecto aspira a centrarse en anticorpos selectivos fronte a algunhas proteínas de membrana do virus. Así, os anticorpos recoñecen as proteínas características que o virus presenta no exterior.

En concreto, a iniciativa, denominada SERSforSARS, combinará a bioloxía molecular, a nanotecnoloxía e a electroscopia SERS para desenvolver un test de detección directa de compoñentes virais por inmunoensaios de fluxo lateral (LFIA). Deste xeito, búscase a identificación ultrasensible do virus e o diagnóstico no momento da atención ao paciente, para o que se traballará con esputo e mostras nasais.

Ademais de Jorge Pérez-Juste, a investigadora da UVigo Lorena Vázquez-Iglesias lidera este proxecto no que participan os profesionais da universidade Isabel Pastoriza e Gustavo Bodelón e persoal do Sergas, como o xefe de Pneumoloxía do Hospital Álvaro Cunqueiro, Alberto Fernández Villar; e o membro do Centro Nacional de Biotecnoloxía Mark van Raaij.