María Lourdes M.C. e o seu fillo Rafael A.M. aceptaron as penas de 2 anos e un ano e medio de prisión, respectivamente, tras chegar a un acordo de conformidade na Audiencia Provincial de Pontevedra, como autores dun delito de detención ilegal, por reter contra a súa vontade á noiva del, menor de idade.
As partes alcanzaron un acordo e, tras o recoñecemento dos feitos por parte dos procesados, a sección quinta da Audiencia Provincial de Pontevedra ditou sentenza, que xa adquiriu firmeza nese mesmo momento, posto que defensa e acusación confirmaron que non apelarán.
Así, condenou a María Lourdes a dous anos de cárcere; e ao seu fillo, ao que se lle aplica a eximente incompleta de alleamento mental, a un ano e medio de prisión. Así mesmo, imponlles a prohibición de achegarse ou comunicarse coa vítima por un tempo de 10 anos.
Na mesma sala foi acordado a suspensión da execución das penas de cárcere por un período de 3 anos, coa condición de que ambos os procesados non delincan durante ese tempo.
Este xuízo, no que se pedían inicialmente 7 anos de cárcere para a muller e 4 anos para o seu fillo, estivo sinalado para xuño de 2019, pero nese momento suspendeuse debido á enfermidade dun dos avogados.
DETENCIÓN ILEGAL
Os feitos remóntanse a febreiro de 2017, cando Rafael A.M. iniciou unha relación sentimental coa vítima, menor de idade. Así, a moza comezou a vivir con el e a súa nai na súa vivenda, situada nunha barriada do partido xudicial de Vigo. Segundo o escrito de acusación pública, aos poucos días a menor explicou á súa parella e á nai que quería abandonar o domicilio, pero estes retivérona contra a súa vontade. De feito, ao principio, permitíanlle saír da vivenda, pero só cando ía acompañada por Rafael.
Posteriormente, prohibíronlle abandonar o domicilio e impedíronlle comunicarse por teléfono coa súa familia se non estaban os acusados presentes “para evitar que comentase o que lle estaba pasando“. A menor permaneceu encerrada durante un mes ata que, nun descoido dos seus captadores, puido contactar coa súa nai, quen alertou da situación á Policía. Así, os axentes liberaron á moza o 21 de marzo de 2017.
ALLEAMENTO MENTAL
Na condena establecida por conformidade, tívose en conta unha eximente no caso de Rafael, xa que padece “un atraso madurativo e coeficiente intelectual límite”, por baixo da media na súa idade.
Así mesmo, tal e como sinala a Fiscalía, trátase dunha persoa dependente e que precisa de apoio para efectuar trámites xurídicos ou administrativos, e a súa “vulnerabilidade” provoca que sexa “facilmente manexable”. Do mesmo xeito, presenta “unha precaria conciencia da súa enfermidade e unha diminución parcial da súa capacidade intelectiva e volitiva”.
