Familiares de persoas falecidas e usuarias da residencia DomusVi en Aldán, en Cangas do Morrazo, achegáronse hoxe ás instalacións para colocar crespóns negros nos valados que pechan os terreos das instalacións.

O número de falecidos segundo os familiares serían “para nós 38, contando coa persoa que faleceu esta semana”. Isto é así pola que consideran falta de información e de datos das autoridades sanitarias e de DomusVi.

A residencia de Aldán, propiedade de DomusVi, foi xunto coa de Barreiro en Vigo, intervida pola Xunta de Galicia ante o número elevado de falecementos, así como ante as acusacións de desatención e falta de medios, tanto de traballadoras da empresa como familiares.

Os e as usuarias que non presentaron síntomas da COVID-19 foran trasladadas a un albergue xuvenil en Nigrán. Alí estaba esperando a ex-delegada da Xunta en Vigo, Corina Porro, actual número dous das listas do PP pola provincia de Pontevedra para as eleccións autonómicas do 12 de xullo.