A Fiscalía pide 14 anos de cárcere para un home, J.C.G.N., ao que acusa de tentar asasinar á súa parella cunha arma branca nun domicilio de Cangas, e que será xulgado este xoves na sección cuarta da Audiencia Provincial de Pontevedra.

Segundo o escrito de acusación pública, os feitos remóntanse ao 7 de febreiro de 2019, cando o acusado se pechou nunha habitación do domicilio coa súa parella e iniciou unha discusión. De súpeto, “de forma inesperada”, atacou a muller cunha arma branca con intención de acabar coa súa vida, dirixindo o ataque ao pescozo.

A vítima logrou parar a arremetida, pero sufriu feridas na cara e, cando trataba de abandonar a habitación, o acusado volveuna a atacar, cravándolle a arma na rexión lumbar. “Só cesou o ataque cando, alertadas polos berros, entraron na habitación unha curmá e a filla menor de idade da vítima”, relata o Ministerio Público no seu escrito.

A Fiscalía, así mesmo, constata que “só a rápida atención médica prestada á lesionada evitou que morrese debido ás feridas”, mentres que o home fuxiu do lugar e foi detido horas despois en Xinzo de Limia (Ourense).

A muller foi atendida no hospital das súas lesións, e quedáronlle secuelas físicas (cicatrices, limitación na apertura temporo mandibular, paresia peribucal,…) e psicolóxicas (tensión postraumática).

Por estes feitos, a Fiscalía acusa a J.C.G.N. dun delito de asasinato en grao de tentativa e pide para el 14 anos de cárcere, así como a prohibición de achegarse á vítima ou comunicarse con ela durante 20 anos.

En canto á responsabilidade civil, pide que indemnice á muller en case 49.500 euros polas lesións e as secuelas, e ao Sergas en 4.683 euros polos gastos da atención sanitaria á vítima.