O Ministerio de Transportes, Mobilidade e Axenda Urbana ditou unha Orde, en vigor desde este martes mesmo, pola que se mantén a prohibición de entrada a portos españois de buques de pasaxe tipo cruceiro procedentes de calquera porto. Esta prohibición, que ata agora fora prorrogada en dúas ocasións, estará vixente en principio ata que finalice o estado de alarma.

Na Orde, publicada este martes no Boletín Oficial do Estado (BOE), explícase que o transporte de pasaxeiros debe conservar “certas medidas de contención e preventivas” para impedir a propagación do coronavirus e deter a progresión da enfermidade. Por esta razón, explica o Goberno, mantense a restrición de entrada dos buques de pasaxe tipo cruceiro vixente desde as 0.00 horas do pasado 13 de marzo.

O Executivo subliña que a Comisión Europea, nunha comunicación datada o 13 de maio, sinala que “os brotes previos de Covid-19 en buques de cruceiro puxeron de manifesto a especial vulnerabilidade das contornas pechadas durante as viaxes longas. Antes de que as embarcacións de cruceiro renoven as súas operacións, os operadores de buques deben establecer procedementos estritos para reducir o risco de contaxio a bordo e para proporcionar asistencia médica adecuada en caso de contaxio”.

Neste sentido, o Goberno apunta que a “aínda complexa situación e a natureza imprevisible e dinámica da súa evolución, así como as directrices e recomendacións da Comisión”, desaconsellan o levantamento da restrición de entrada de cruceiros a portos españois mentres os operadores non establezan procedementos “estritos” para reducir o risco de contaxio a bordo e os portos na súa ruta poidan, en caso de necesidade, organizar para que os viaxeiros e os membros da tripulación reciban tratamento médico e se poidan levar a cabo repatriacións e cambios de tripulación.

Tamén como medida preventiva, a Orde de Transportes tampouco permite recalar en porto español aos buques e embarcacións de recreo estranxeiras que non teña o seu porto de estancia en España, salvo as que entren soamente con tripulación profesional a bordo.