O número de casos activos de coronavirus COVID-19 aumentou en 66 desde este mércores ata os 6.085, o que supón un un por cento máis que a xornada pasada, e as altas incrementáronse en 85 para situarse nas 1.383.
Por outra banda, o falecemento de tres persoas en residencias de maiores nas últimas horas elevou a 405 o número de vítimas mortais do coronavirus en Galicia, segundo os datos que comunicou este xoves a Consellería de Sanidade.
Así, as autoridades sanitarias informaron da morte de dous residentes no centro Claudina-Somoza da Coruña e dun terceiro, na residencia de San Pedro de Crecente (Pontevedra). Con este tres falecementos, ascenden a 95 as mortes rexistradas en residencias de maiores. Así mesmo, Sanidade sinalou que, ademais dos 95 falecidos en residencias de maiores, hai outras 86 persoas vinculadas a centros residenciais que morreron, ou ben en hospitais, ou ben en residencias integradas. Por tanto, do total de falecidos, hai 181 persoas vinculadas con centros residenciais.
Con respecto aos hospitais galegos e tras as 11 mortes comunicadas este mércores, o balance ascende polo momento a 310 falecidos: 93 en hospitais da área sanitaria da Coruña, 63 na área de Vigo, 59 mortes na área de Ourense, 42 falecidos na área sanitaria de Santiago, 20 en Ferrol, outros 21 en Lugo e 12 falecidos na área de Pontevedra.
