A Plataforma Galicia-Escudocovid19.org, coordinada pola Universidade de Vigo xunto coa Asociación de Industriais Metalúrxicos (Asime), entregou xa 2.000 pantallas protectoras ao Complexo Hospitalario Universitario de Ourense (CHUO).
EscudoCovid19 é unha iniciativa popular e sen ánimo de lucro cuxo obxectivo é “deseñar, producir e distribuír material de protección, en concreto, pantallas de protección facial para os centros sanitarios, corpos e forzas de seguridade do estado, e demais actores que loitan a diario contra a pandemia”, explicou Asime.
Desde o campus de Ourense participan no proxecto os profesores da Escola de Enxeñaría Aeronáutica e do Espazo, José Antonio Pérez, Higinio González e Iván Area. “Nos próximos días esperamos facer máis entregas e atender algunha outra necesidade como poden ser as residencias de maiores”, explicou Higinio González en nome da organización.
Esta entrega súmase ás 9.700 pantallas que en días anteriores o proxecto Escudocovid19 puxo a disposición dos servizos sanitarios da área de Vigo, grazas á participación de máis de 15 empresas galegas involucradas no proceso de deseño, fabricación e distribución de material sanitario en Galicia.
“Producimos ao redor de 5.000 pantallas diarias nunha planta de Mos e a idea é continuar coa distribución. Pensamos que aos poucos irá chegando máis material e, nun par de semanas, non fará falta tanta produción, pero nestes momentos cremos que pode axudar”, sinalou o profesor do campus de Ourense.
En concreto, a empresa Valver é unha das que está a levar a cabo de maneira altruísta a produción galega dos escudos nas súas instalacións en Mos, adaptando os tempos, medios e persoal ás necesidades desta situación excepcional.
Entre as empresas que se uniron a esta iniciativa atópanse Adhex, Dalot, Dativic, Lupeon, MCSyncro, Mepronor, Plascies, Plymouth, Troqueles Galicia. A elas súmanse as achegas económicas e esforzos doutras como Cerradoras López Galicia, Coren, Distevi, Gadisa, Fabricacións Parma, Instalacións do Noroeste, Itera Técnica, Metaldeza, Onice Estudos e Proxectos, Resinas Castro, Royal Roos Enxeñaría, Umiametal e Vigumat.
INDUSTRIA GALEGA
“Como sociedade temos que aprender desta crise e como universidade temos que estar na vangarda”, sinalou Higinio González. “Está a ser moi grato ver como a industria galega reorganízase rápido para producir material sanitario. Creo que temos unha capacidade industrial latente que debemos valorar e empuxar, agora e cando todo isto pasase”, continuou.
Escudocovid19, na que se enmarca a plataforma galega, é unha iniciativa popular a nivel estatal que naceu co obxectivo de “mobilizar capacidades económicas e produtivas para fabricar, de maneira áxil e accesible en grandes cantidades, unha ampla variedade de equipos destinados ao persoal sanitario”.
