Política Social iniciou este xoves o traslado de residentes do centro xeriátrico DomusVi do barrio vigués de Barreiro, que deron negativo nas probas do coronavirus, e que serán reacollidos na Residencia de Tempo Libre da Xunta en Panxón, Nigrán (Pontevedra).
Así o confirmaron fontes da administración autonómica, que precisaron que, neste primeiro traslado, reacollerase a catro dos maiores residentes nese xeriátrico vigués, un dos dous centros privados intervidos pola Xunta (xunto á residencia DomusVi de Aldán, en Cangas).
A estes residentes (que se trasladarán en ambulancias, de forma individual), sumaranse en próximos días outros maiores desta residencia viguesa e do centro xeriátrico de Aldán que, ademais de cumprir o requisito de estar libres do COVID, deben ser ‘maiores válidos’.
Na residencia DomusVi de Barreiro contabilizáronse, ata o momento, 6 falecidos (4 deles no hospital e 2 na propia residencia), e hai 72 maiores que deron positivo en COVID; mentres que, no centro de Aldán, rexistráronse 7 mortes (2 no hospital e 5 no propio centro xeriátrico), e ten 104 maiores infectados por coronavirus.
PRIMEIRAS MEDIDAS TRAS A INTERVENCIÓN
Segundo trasladou Constantino Piñeiro, o xerente que a Xunta nomeou para estas dúas residencias, na xornada deste xoves empezáronse a repetir as probas a todos os maiores que xa deran negativo, 58 en Barreiro e 30 en Aldán, para confirmar que non teñen o virus e trasladalos, “sempre que o seu diagnóstico o permita”.
