O Goberno galego analizou este xoves o anteproxecto para reformar e recuperar, en palabras do presidente galego, Alberto Núñez Feijóo, o “emblemático” edificio da Estación de Autobuses de Vigo como centro interxeracional, despois de que este servizo pase a desenvolverse na futura intermodal.

Cun investimento de case 5 millóns de euros, o obxectivo é que o futuro centro conte cun centro de día, con 80 prazas para persoas maiores; cunha escola infantil de ata 82 prazas; cunhas oficinas para técnicos de servizos sociais; e cun espazo sociocultural, que estará composto por unha aula multiusos, unha sala de exposicións e unha cafetaría.

O edificio, “plenamente sustentable”, contará, ademais, con paneis fotovoltaicos, con puntos de recarga de batería, cun xardín interior parcialmente cuberto e a disposición dos usuarios do centro de día, da escola infantil e dos demais servizos do edificio; e cun aparcadoiro para máis de 230 vehículos, que poderán usar durante o día os usuarios do centro e durante a noite todos os veciños do barrio.

Este proxecto suporá a reforma e a recuperación dun edificio emblemático na cidade, desde o punto de vista arquitectónico, cunha estrutura moi recoñecible, e novas prazas de atención á infancia e ás persoas maiores.

Feijóo subliñou que para o funcionamento cotián da escola infantil e do centro de día destinaríanse case 1,5 millóns de euros anuais.