A Xunta de Galicia instou ao Ministerio de Transportes, Mobilidade e Axenda Urbana (antes Fomento), como titular da autoestrada AP-9, a que elixa unha das tres alternativas que lle remitiu hai semanas para a iluminación da ponte de Rande, de modo que a actuación se poida acometer “canto antes”.

A conselleira de Infraestruturas e Mobilidades, Ethel Vázquez, e o vicepresidente da Xunta, Alfonso Rueda, fixeron públicas este luns as tres propostas, deseñadas por tres empresas, e para cuxo financiamento (que debería correr a cargo da concesionaria Audasa, “pola súa propia imaxe”), ofreceron colaboración económica do goberno galego.

A primeira das opcións é a exposta pola empresa Biar Lighting, cun custo de 226.000 euros, e que suporía iluminar só os tirantes da ponte; a segunda opción, da empresa SETGA, ten dúas variantes: a iluminación só do taboleiro con 600 proxectores (cun custo de 650.000 euros) e a iluminación de taboleiro, tirantes e pilonos (cun custo de 1 millón de euros); e, finalmente, a empresa Signify (división de iluminación de Philips) propuxo a iluminación de taboleiro, pilonos e tirantes, cun control de cor e de escenas, cun custo de 500.000 euros.

A conselleira Ethel Vázquez lembrou que este proxecto para iluminar a ponte, no que “está implicado persoalmente” o presidente da Xunta (que o propuxo á concesionaria en 2017), permitirá pór en valor unha “icona reconocible”, un “símbolo” de Vigo e de Galicia e un “prodixio da enxeñaría” que recibiu múltiples recoñecementos.

Por iso, tanto a titular de Infraestruturas e Mobilidade, como o propio vicepresidente galego, Alfonso Rueda, instaron ao Goberno a elixir, xa que a execución da medida “só depende da decisión” do Ministerio de Transportes, Mobilidade e Axenda Urbana.

MALESTAR NO GOBERNO DE ESPAÑA

O Ministerio de Transportes, Mobilidade e Axenda Urbana (Mitma) tachou de “improcedente” a presentación, por parte da Xunta de Galicia, das propostas para iluminar a AP-9 na ponte de Rande, xa que “non ten competencias” sobre ese viario “nin achega fondos para ese proxecto”.

O Ministerio lembrou que é “a única administración” competente para a promoción e autorización dese proxecto de iluminación ornamental, e cualificou como “sorprendente” que o Goberno galego “actuase con esa deslealdade e falta de respecto ao Goberno de España e á cidadanía, ao tentar situarse na presentación dun proxecto que lle é totalmente alleo“.

O departamento que dirixe o socialista José Luís Ábalos, puntualizou que a Xunta nin ten competencias nin achega fondos, polo que “o avance informativo que realizou considérase de todo punto improcedente e supón un intento de apropiación dun proxecto” deste departamento.

O Ministerio trasladou o seu “máximo interese” nesta actuación e avanzou que a Dirección Xeral de Estradas “está a analizar os aspectos técnicos da documentación presentada pola concesionaria Audasa”, xa que esa iluminación pode afectar a aspectos como a seguridade viaria e debe cumprir a normativa vixente.

“O obxectivo deste Ministerio é que, unha vez determinada a proposta máis conveniente desde o punto de vista técnico, se poidan atopar formas de financiamento da mesma que non supoñan unha carga para os cidadáns de Vigo”, reza o comunicado do Mitma.

Finalmente, criticou que a Xunta difundiu ” indebidamente” a información sobre as propostas de iluminación e pediu ao Goberno galego “que respecte as canles institucionais”, á vez que asegurou que informará á cidadanía “dos avances que se vaian producindo”.

AP-9

Ademais, a conselleira e o vicepresidente tamén se referiron a outras reclamacións relacionadas con esta autoestrada. Así, Alfonso Rueda lembrou que hai case dous anos que Sánchez é presidente do Goberno e deixou “esquecidas nun caixón” as demandas que antes sostiñan os socialistas, como a eliminación da peaxe en Redondela.

Alfonso Rueda sinalou tamén ao BNG, que presumiu de certos logros no acordo de investidura, e que non están a ter resposta por parte do PSOE. A ese respecto, apuntou que aínda non se constituíu a comisión de seguimento prometida, que non hai compromiso sobre a gratuidade da peaxe para os usuarios recorrentes e que, en definitiva, “o único que fixo o BNG foi asinar un papel que xa se está incumprindo”.

Pola súa banda, Ethel Vázquez, sinalou, a preguntas dos medios, que a denuncia interposta ante a Comisión Europea por parte da asociación En-Colectivo (que considera ilegais as prórrogas da concesión a Audasa) é o resultado do “malestar” crecente entre os cidadáns polo incremento das peaxes.