InicioSociedadeO xuízo polo asasinato de Ana Enjamio encara a súa recta final...

O xuízo polo asasinato de Ana Enjamio encara a súa recta final cos últimos peritos e a deliberación do xurado

O acusado, César A.O., enfróntase a penas que oscilan entre 27 e 39 anos de prisión.

PUBLICADO O

- Advertisement -

O xuízo polo asasinato da moza enxeñeira Ana Enjamio, ocorrido en Vigo na madrugada do 16 ao 17 de decembro de 2016, encara a súa recta final a próxima semana, coa declaración dos últimos peritos e a presentación de conclusións e informes finais.

Así, xusto cando se cumprirán tres anos do crime, este martes, renovarase a vista con tribunal popular que xulgará a César A.O., procesado polos delitos de asasinato, acoso e vulneración da intimidade, e para quen as acusacións solicitan penas que oscilan entre os 27 e os 39 anos de cárcere.

Unha vez que se escoite a estes últimos especialistas, e que se confirmen ou modifiquen as conclusións, as partes presentarán, xa o mércores, os seus informes finais e tratarán de convencer ao xurado da culpabilidade ou, no seu caso, inocencia do acusado (o seu avogado defensor pediu a libre absolución, ao entender que non hai indicios obxectivos que o incriminen).

A partir dese momento, o xurado que conforma o tribunal (5 homes e 4 mulleres) recibirá as instrucións e comezará a deliberación para conformar o obxecto de veredicto. Nese documento deberán determinar que feitos consideran probados ou non probados, e argumentalo con arranxo á proba practicada na vista.

O xuízo por este crime comezou o pasado 9 de decembro e, ao longo das últimas xornadas, prestaron declaración, ademais do acusado, decenas de testemuñas e peritos, así como familiares da vítima.

DECLARACIÓNS

César A.O. negou ante o tribunal matar a Ana, e relatou que despois da cea de empresa na que ambos coincidiron, marchou á súa casa. Á mañá seguinte, cando a Policía o citou en Comisaría e acudiu a declarar, quedou “en shock” ao coñecer a noticia da morte da nova, coa que mantiña unha “relación clandestina”, segundo o seu relato.

Por contra, varios compañeiros de traballo de ambos explicaron que o acusado estaba “obsesionado” con Ana, que insistía para renovar a relación que deixaran, que a seguía e controlaba, e que chegou dicir que, se non estaba con el, tampouco estaría con Samuel (o exmozo de Ana co que ela retomara a relación).

Ademais, varios peritos de Policía Científica e do Instituto Nacional de Toxicoloxía confirmaron que se acharon restos de sangue da moza no coche do acusado, e que tamén se atoparon restos biolóxicos de César na roupa que Ana vestía cando foi asasinada.

A moza faleceu desangrada tras recibir case unha trintena de coiteladas (cunha arma branca dun só fío e unha folla de polo menos 11 centímetros de lonxitude), das que varias lle atravesaron o corazón. Segundo as forenses que declararon ante o tribunal, o autor destes feitos “quería asegurarse o resultado de morte”, posto que unha soa desas coiteladas no corazón sería suficiente para causar o falecemento da moza.

ÚLTIMAS

Piden catro anos de prisión para dous acusados de tráfico de drogas

A Fiscalía pide 4 anos de cárcere para dúas persoas acusadas de tráfico de...

Roubou un coche e levou a unha nai e os seus fillos: Fiscalía solicita penas severas en Vigo

A Fiscalía solicita 16 anos e 8 meses de prisión para un home acusado...

Derrube dunha bancada en Gondomar durante un partido provoca varios feridos

No operativo participaron os profesionais de Urxencias SaniVarias persoas resultaron feridas tras ceder un muro...

Varios feridos, entre eles un xogador, tras ceder un muro das gradas no campo de fútbol do Gondomar

Un partido de fútbol cadete entre o Gondomar CF e o Val Miñor rematou...