O Tribunal Superior de Xustiza de Galicia (TSXG) considera que a sentenza sobre os apartamentos turísticos vigueses de Samil 55, que “non serán demolidos”, está “totalmente executada” a través da súa conversión para uso turístico.

Así o determinou a sección segunda do Contencioso-administrativo do TSXG, que desestimou o recurso de reposición interposto contra o auto de xullo de 2019, no que acordaba o arquivo do incidente de execución de sentenza. Este recurso alegaba a imposibilidade de cumprir os requisitos deste arquivo, algo que rexeita o TSXG.

“Non hai un acto contrario aos pronunciamentos da sentenza”, indica o alto tribunal galego, que lembra ao recorrente que nesa sentenza “contémplase a posibilidade de que o inmoble se poida utilizar con fin hoteleiro, en lugar de proceder á súa demolición, prevendo incluso a realización de determinadas obras necesarias para a súa adaptación a ese fin”.

Ademais, os maxistrados subliñan que conta con licenza de obras de adaptación ao uso hoteleiro, licenza de actividade para uso hoteleiro e licenza de primeira ocupación. Segundo o TSXG, “non pode atribuírse a relevancia que pretende a parte executante á esixencia do documento xustificativo do Rexistro da Propiedade da modificación/cancelación das inscricións rexistrais relativas ao uso como vivenda”. Pola contra, destaca que esta é “unha realidade xa superada pola acreditación do uso turístico consecuencia do exame da documentación achegada”.