O novo centro de saúde da localidade pontevedresa de Gondomar iniciará a súa actividade na tarde do próximo venres día 22 de novembro, anunciou o Servizo Galego de Saúde (Sergas).

Unha vez que o Concello de Gondomar realizou todos os trámites administrativos necesarios para a súa posta en funcionamento e oficializou a licenza de actividade do centro, o Sergas xa está en condicións de pór a disposición da poboación esta nova infraestrutura sanitaria.

Este novo centro de saúde substituirá o actual, polo que o traslado se vai  realizar a partir das 12,00 horas do venres, de forma que nesa mesma xornada os profesionais da Unidade de tarde xa poidan pasar consulta nas novas instalacións.

Cunha superficie de máis de 1.600 metros cadrados, supón un 160% máis de espazo que o actual e constará de seis consultas de medicina xeral, seis de enfermaría, unha consulta de matrona, unha sala de educación social, unha sala de toma de mostras, unha sala técnica, unha sala polivalente e unha sala de atención ás urxencias.

Na área pediátrica dispón dunha consulta e unha enfermaría. Tamén ten, entre outras dependencias, unha área de admisión e un espazo específico para traballo administrativo. Todo iso, para atender unha poboación de máis de 10.600 persoas.