Máis de medio cento de axentes da Policía Nacional de varias comisarías de España participan este luns no XIV curso sobre seguridade portuaria que se desenvolve en Vigo, e no que se porán ao día acerca de normativa, protocolos de actuación e peculiaridades da seguridade neste tipo de instalacións.
O curso foi inaugurado pola subdelegada do Goberno, Maica Larriba; o xefe superior de Policía de Galicia, José Luís Balseiro; o alcalde da cidade, Abel Caballero; e o presidente da Autoridade Portuaria de Vigo, Enrique López Veiga.
Balseiro destacou que a Policía debe enfrontarse ás actuacións nos portos tendo en conta o cambio que supuxo, en materia de seguridade global, o ataque terrorista do 11S.
Antes diso, precisou, a seguridade nos portos centrábase no salvamento marítimo, e agora, “por imperativo legal da Organización Marítima Internacional”, os portos tiveron que “estandarizarse”, a través dos códigos ISPS ou PBIP, para os seus criterios de seguridade.
“É aí onde nós intervimos. Non tanto para a seguridade das instalacións, senón para a seguridade dos tráficos, en sentido amplo, tanto de persoas como de mercadorías”, precisou.
SEGURIDADE COMO “ACTIVO COMERCIAL”
Pola súa banda, o presidente do Porto de Vigo, Enrique López Veiga, destacou que a seguridade nunha terminal portuaria é “un activo comercial”, e lembrou os esforzos da Autoridade Portuaria viguesa nesta materia, pondo como exemplo o centro de control, que actúa “como un ‘grande irmán'”.
“Que un porto poida dar garantías de que non van pasar cousas raras é un factor para que unha empresa decida instalarse aí”, aseverou, e incidiu en que este curso “interesa moito” ao porto olívico, que aposta pola seguridade como un activo importante.
