O alcalde de Vigo en funcións, Abel Caballero, confirmou este venres en rolda de prensa que as obras de reforma da Gran Vía iniciaranse a próxima semana, no que será “o maior proxecto de pasarelas ao aire libre de Europa”.

Segundo explicou o rexedor, a colocación das ramplas entre María Berdiales e Venezuela iniciarase o martes, unha obra que conta cun orzamento de algo máis de 5 millóns de euros e que inclúe renovación de redes, reordenación de tráfico, espazos abertos de descanso, iluminación e conexións con edificios.

Así, en palabras de Abel Caballero, trátase “dunha obra 4.0, coas últimas tecnoloxías e dialéctica interactiva” e que inclúe “as primeiras pasarelas mecánicas e de maior lonxitude que se fixeron nunca neste país”.

As obras teñen un prazo de execución de 8 meses e, ademais de mellorar a mobilidade con esas pasarelas, permitirán dobrar o volume de masa vexetal. “É unha obra que a cidade espera con expectación”, apuntou o alcalde, quen lembrou que esta é a primeira fase dunha actuación que prevé estenderse ata a Praza de España e, posteriormente, cara á Praza de América.