A Fiscalía pide cinco anos de cárcere para o avogado C.D.O., ao que acusa de apropiarse de 60.000 euros dunha clienta, e que será xulgado o mércores na Sección Quinta da Audiencia Provincial de Pontevedra, con sede en Vigo.

Segundo o escrito de acusación pública, este avogado retirou 60.000 euros dunha conta da súa clienta, coa autorización desta, para negociar e pagar un préstamo hipotecario vencido. Pero o acusado non destinou o diñeiro ao fin que lle encomendaron, e tampouco llo devolveu á súa lexítima dona.

Por estes feitos, a Fiscalía acúsao dun delito de apropiación indebida e pide para el 5 anos de cárcere, ademais de 5 anos de inhabilitación para o exercicio da avogacía. Reclama tamén que pague unha multa de 4.500 euros e que indemnice á prexudicada en 60.000 euros.