O grupo municipal Marea de Vigo tachou de “irresponsable” ao alcalde, Abel Caballero, por urxir a ampliación do polígono de Balaídos para dar cabida aos provedores da planta de PSA Peugeot Citroën. Advertiron de que “ningunha empresa” accede a ampliar as súas instalacións en condicións de “inseguridade xurídica“, xa que a lei 3/2016 (cuxa aplicación suxire o rexedor) non permite modificar a cualificación do chan.

A preguntas dos medios, o portavoz do grupo, Rubén Pérez, precisou que a demanda de ter preto os provedores era unha reclamación que tiña sentido hai anos, cando PSA traballaba co modelo ‘just in time’, porque esixía a provisión de pezas cada pouco tempo, aforrando en almacenaxe e reducindo custos. Agora, implantado o modelo ‘full kitting’, que supón a provisión de pezas a través de kits xa preseleccionados e transportados por robots, ningún provedor demanda instalarse á beira da fábrica.

“INCAPACIDADE” DO ALCALDE

Por outra banda, Rubén Pérez lembrou que, en 2015, existía un convenio entre Zona Franca e o Concello para a ampliación do polígono de Balaídos, pero “o Plan Xeral caeu” (foi anulado polo Tribunal Supremo a finais de 2015).

“Se entre 2015 e 2019 a planta de PSA non se puido ampliar foi única e exclusivamente pola incapacidade política de Abel Caballero de levar adiante, xa non digo un novo PXOM, que xa sabemos que é incapaz, se non de facer unha modificación puntual do existente, ou de rescatar o convenio que quedou no 2015 nas pavías”, proclamou o portavoz de Marea.

A ese respecto, criticou que se utilice a planta automobilística como “reclamo político” en época electoral e que todos queiran erixirse en “salvadores de Citroën”. Por iso, apelou á propia empresa a que traslade “por escrito” cales son as súas necesidades e proxectos.

Finalmente, incidiu en que nin Citroën, nin IKEA nin “ningunha empresa” ampliarán o seu espazo ou se instalarán en condicións de “inseguridade xurídica”. “O alcalde é un irresponsable con Citroën. Son eu máis responsable, con todas as miñas críticas”, sentenciou.

AMPLIACIÓN “URXENTÍSIMA”

Pola súa banda, o alcalde, Abel Caballero, nunha rolda de prensa, volveu  insistir en que a ampliación do polígono de Balaídos é unha demanda de Citroën que o novo director da planta, Ignacio Bueno, lle trasladou na reunión que mantiveron hai uns días. “Queren que as industrias auxiliares estean o máis preto posible, parece moi razoable (…) porque aforran en transportes e en tempo”, reiterou.

Segundo o rexedor, a dirección da planta automobilística expuxo  esa necesidade de espazo para os provedores, tanto a Zona Franca como ao Concello. “Eu acéptoo encantado, porque é a miña teoría. Imos recuperar o parque industrial que estaba previsto a través da ‘lei Vigo’ (lei 3/2016)”, proclamou. Nesa liña, Caballero expresou: “Sorpréndeme que a Xunta, no canto de dar vantaxes a Citroën, diga que non é urxente. É urxentísimo”. Asemade, lamentou que “a Feijóo non lle gusta que as cousas vaian ben na xestión do Concello”.