O grupo municipal do PP no Concello de Vigo denunciou este martes que o goberno de Abel Caballero “falseou as contas” para pagar o rescate do Auditorio Mar de Vigo, computando o ingreso de 5,6 millóns de euros pola venda do antigo reitorado, cando esa venda aínda non se fixo.
Así o explicou en rolda de prensa o edil ‘popular’ Miguel Fidalgo, quen recordou que o proceso de venda do antigo reitorado da rúa Areal (que comprará Zona Franca) aínda está en fase de exposición pública, e pendente dunha modificación urbanística, así como da súa aprobación en xunta de goberno e en pleno.
O concelleiro Fidalgo denunciou que o goberno vigués “está a saltarse a lei” para facer fronte á quebra da concesión do Auditorio, unha quebra que levaría ao equipo de Caballero (segundo o PP) a “vender todo” para pagar antes do pasado 31 de decembro.
A ese respecto, recordou que, ademais dos 5,6 millóns da venda do reitorado, o goberno local “desviou” para ese rescate outros 4 millóns da Xerencia de Urbanismo que “debían destinarse á promoción pública de vivenda”. A iso súmanse 15,6 millóns de euros de remanentes, 8 millóns procedentes do superávit, e outros 2,6 millóns da venda do antigo hotel Samil.
Segundo as contas do grupo municipal do PP, estes 35 millóns non foron o custo final da operación do Auditorio, posto que o goberno vigués xa desembolsara outros 35 millóns. “En total, máis de 70 millóns de fondos públicos pagados con diñeiro de todos os vigueses”, criticou.
O goberno local de Vigo respondeu á denuncia do PP a través dun comunicado do concelleiro de Facenda, Jaime Aneiros, remitido aos medios de comunicación.
Nel, Aneiros recorda que a operación “vantaxosa” de rescate do Auditorio conta co aval do xuíz mercantil que supervisou o proceso concursal, asi como co visto e prace do interventor e do tesoureiro do Concello.
“O que ten que explicar o señor Fidalgo é se cre que tiñamos que pagar 84 millóns, como o PP dicía”, apostilou, e afirmou que o edil ‘popular’ debería “volver a primeiro de Económicas, e aínda así, tería dificultades”.
