O Concello do Porriño intensificou as medidas de aforro de auga aplicadas durante as últimas semanas e pediu ás empresas e á veciñanza que reduzan o consumo ante a actual situación de prealerta. O Goberno local explicou que a escaseza de precipitacións e as altas temperaturas fan necesario incrementar as restricións no uso da auga e reforzar o control para detectar posibles usos inadecuados ou captacións ilegais.

LIMITACIÓN DAS REGAS E DOS USOS NON ESENCIAIS

O Concello deu a orde de limitar as regas en parques, xardíns e campos de fútbol, xunto con outros usos considerados non esenciais. Desde o Executivo municipal insisten en que a prevención e a concienciación serán fundamentais durante as próximas semanas no caso de que non se produzan precipitacións. Por este motivo, solicitan a colaboración directa das empresas e da cidadanía para adoptar hábitos de consumo responsable. Entre as recomendacións figuran limitar as regas, pospoñer o lavado dos vehículos e evitar o enchido de piscinas.

BAIONA TAMÉN PROHIBE VARIOS USOS DA AUGA DA REDE

O Concello de Baiona adoptou esta mesma semana medidas semellantes para reducir o consumo. O Goberno local prohibiu empregar auga da rede municipal para regar xardíns, encher piscinas ou lavar vehículos particulares.