O alcalde de Vigo, Abel Caballero, anunciou que a Xunta de Goberno Local aprobará este venres a contratación dunha exposición inmersiva sobre Jules Verne con motivo do 200 aniversario do seu nacemento, cun investimento superior aos 2 millóns de euros. A mostra, denominada “Jules Verne 200”, instalarase no Mar de Vigo e permanecerá na cidade durante seis meses. Para facela posible, o Concello destinará 1,8 millóns de euros á transformación da planta baixa do auditorio. Segundo explicou o rexedor, esta actuación permitirá acondicionar un espazo que, unha vez rematada a exposición, poderá empregarse para acoller outras mostras, eventos e congresos de características semellantes. “A partir de aí, as exposicións e os congresos en Vigo disporán de toda a planta baixa, da que ata agora non dispoñían”, xustificou Caballero.

SETE ÁMBITOS TEMÁTICOS E CATRO ESPAZOS DIFERENCIADOS

O proxecto contempla a creación dunha gran sala rectangular na que se instalarán sete ámbitos temáticos relacionados co escritor francés. A exposición contará tamén con catro espazos diferenciados: unha zona de introdución, outra de carácter inmersivo, un apartado dedicado ao metaverso e un último centrado na relación entre Jules Verne e Vigo. O percorrido comezará cunha das obras máis coñecidas do autor, “20.000 leguas de viaxe submarina”, e continuará con referencias á batalla de Rande, ao capitán Nemo e á presenza da ría de Vigo na súa obra.

UNHA MOSTRA QUE COMEZARÁ EN VIGO E CHEGARÁ A PARÍS

Caballero definiu a exposición como “única” e avanzou que ofrecerá sesións de mañá e de tarde durante os seis meses nos que permanecerá aberta na cidade. “Quero que a vexa todo Vigo, que vaia toda a cidade á mostra inmersiva, porque terá sesións de mañá e de tarde. Van ter algo que nunca viron, porque se trata dunha mostra inmersiva con metaverso que vai empezar en Vigo”, afirmou. Unha vez finalizada a súa estadía na cidade, “Jules Verne 200” trasladarase a París en 2028.