O conselleiro de Sanidade, Antonio Gómez Caamaño, destacou este xoves o “liderado” do hospital Álvaro Cunqueiro de Vigo en cirurxía cardiovascular, coa aplicación de “técnicas pioneiras” e a realización de preto de 670 intervencións ao ano, das cales máis de 530 son cirurxías maiores. Así o sinalou durante o acto de inauguración do XXVIII Congreso da Sociedade Española de Cirurxía Cardiovascular, que se celebra esta semana na cidade olívica.

No seu discurso, o conselleiro destacou que a sanidade galega reforzou nos últimos anos a súa posición internacional en técnicas valvulares pioneiras, cun especial protagonismo do hospital Álvaro Cunqueiro. Gómez Caamaño subliñou que o centro vigués está á “vangarda” en procedementos minimamente invasivos, un ámbito no que, segundo puxo en valor, Galicia ten acadado unha posición destacada.

Antes da intervención do conselleiro, Juan José Legarra, presidente da Sociedade Española de Cirurxía Cardiovascular e Endovascular e xefe de servizo do Álvaro Cunqueiro, destacou a intensidade da programación científica do congreso, así como a elevada asistencia de profesionais e representantes da industria.

Pola súa banda, María Anxos Bruño, presidenta da Asociación Española de Perfusionistas, que tamén celebra este ano o seu congreso anual en Vigo xunto cos cirurxiáns cardiovasculares, puxo en valor a importancia de “compartir” coñecemento e experiencias co resto de compañeiros de toda España en encontros deste tipo. A celebración destes congresos na cidade reforza así o papel de Vigo como punto de encontro sanitario e científico, ao tempo que permite visibilizar o traballo desenvolvido no Álvaro Cunqueiro nunha especialidade de alta complexidade como a cirurxía cardiovascular.