O Concello do Porriño está máis preto de contar con novos símbolos oficiais propios, tanto escudo como bandeira. A directora xeral de Administración Local, Natalia Prieto, presidiu este xoves a reunión da Comisión de Heráldica na que se informou de maneira favorable sobre a proposta para a súa aprobación polo Consello da Xunta. O ditame favorable da Comisión supón un novo paso no proceso para modificar ou adaptar os símbolos municipais, que deberá completarse coa aprobación definitiva por parte do Goberno galego.
Ata o momento, a Xunta leva aprobados 289 escudos e bandeiras tras a petición das respectivas entidades locais de Galicia para modificar, rehabilitar ou adaptar os seus símbolos ao decreto que regula esta materia. Tal e como explicou Natalia Prieto, os concellos e demais entidades locais galegas poden adoptar escudos heráldicos e bandeiras propios e privativos, modificar os xa existentes ou rehabilitar aqueles que historicamente empregaron.
Estas propostas deben basearse sempre en feitos históricos ou xeográficos característicos e peculiares do territorio, ademais de axustarse ás normas propias da heráldica. A normativa establece tamén que ningunha entidade local de Galicia poderá utilizar un escudo heráldico ou unha bandeira que non fosen aprobados polo Consello da Xunta, agás aqueles símbolos que xa foran autorizados pola Administración do Estado antes da transferencia de competencias á Comunidade Autónoma.
