O grupo municipal do PP vén de criticar novamente as políticas culturais do goberno de Vigo e acusou ao rexedor Abel Caballero de reducir a cultura a “unha única expresión”, que “só gusta ao alcalde”, “acabando coa diversidade, o talento, a innovación e as formas de expresión”.
Así o trasladou, a través dun comunicado remitido aos medios, a concelleira Teresa Egerique, quen lamentou a “perda de identidade que sempre tivo Vigo como cidade innovadora, alternativa e con numerosas canles de expresión cultural”.
Segundo denunciou a edil do PP, a actuación do actual goberno municipal inclínase por unha cultura “única e unilateral, que só gusta ao alcalde”, en lugar de ser entendida como un “amplo abanico de posibilidades e actividades que xorden en todo momento da sociedade”.
Ao seu xuízo, os alcaldes e gobernos locais deben ser “meras canles de transmisión” da cultura, en lugar de “monopolizala e reducila a unha única expresión”.
Teresa Egerique sinalou que, nos seus 11 anos de goberno, Abel Caballero só apoiou “a súa cultura, a cultura que a el lle gusta e que non sempre ten que coincidir coa oferta que os vigueses demandan”.
“Somos unha cidade cunha grandeza cultural impresionante, con multitude de posibilidades que non se están aproveitando”, proclamou Egerique, quen advertiu de que a actuación do goberno local e a súa falta de apoio “abocou á desaparición a numerosas iniciativas de carácter artístico, musical, fotográfico e teatral”.
