A Fiscalía solicita penas que suman tres anos e 10 meses de prisión para un membro do GES do Val Miñor por tres delitos de coaccións cometidos sobre dous superiores e un compañeiro de traballo, así como por dous delitos de lesións psíquicas e outro de lesións. O acusado será xulgado este martes na sala do Penal 1 de Vigo tras levar a cabo comportamentos de carácter violento e hostil cara ao coordinador do servizo, a delegada de persoal e prevención e o resto dos seus compañeiros.

Segundo o escrito do ministerio público, este home xerou durante un tempo prolongado unha situación de conflito dirixida á procura reiterada de confrontación. O acusado cuestionaba as ordes do seu coordinador, negábase a facer traballos e non cumpría os protocolos de desinfección. Ademais, intimidaba e gritaba aos seus compañeiros con expresións como “vouvos queimar a todos aquí dentro” ou “a ver se morredes todos“.

Por outra banda, o peón non acudía ás reunións de traballo malia ser requirido e afirmaba que a delegada de persoal ocupaba o seu posto por facer favores. Esta actitude provocou tal tensión que as quendas de traballo tiveron que ser modificadas e foi necesaria a intervención da Inspección de Traballo. Como consecuencia desta situación, os seus dous superiores e un dos seus compañeiros sufriron trastornos de ansiedade.

Por estes feitos, a Fiscalía acúsao de tres delitos de coaccións en concurso con dous delitos de lesións psíquicas menos graves e un de lesións. Ademais da pena de cárcere, o ministerio público pide unha multa de 810 euros, a prohibición de comunicarse ou achegarse aos prexudicados durante dous anos e o pago de indemnizacións que suman 17.830 euros.