A Consellería do Medio Rural comunicou ao Ministerio de Agricultura, Pesca e Alimentación (MAPA) a detección dun exemplar de ave silvestre afectado por gripe aviaria en Vigo, resultado confirmado polo Laboratorio Central de Veterinaria de Algete (Madrid). Tal e como trasladou a Xunta nunha nota de prensa, trátase dunha gaivota patiamarela atopada no municipio de Vigo e que foi trasladada ao Centro de Recuperación de Fauna Silvestre da Consellería de Medio Ambiente e Cambio Climático de Cerdedo-Cotobade, na provincia de Pontevedra.
A ave foi mostrexada para proceder á análise laboratorial, eliminándose o cadáver conforme á normativa en vigor. Con este novo foco, son 15 os notificados en aves silvestres confirmados na comunidade en 2025, pero cómpre destacar que, por agora, non se rexistrou ningún caso en aves de curral en Galicia. Con respecto á situación en España, no actual período de vixilancia anual, o número de focos en aves silvestres notificados por España ascende a 121, un “número elevado comparado cos datos de anos anteriores”.
A situación en Europa tamén reflicte un incremento “considerable” no número de focos nas últimas semanas. Esta situación epidemiolóxica é a principal razón, xunto coa migración estacional das aves silvestres e o descenso das temperaturas nesta época do ano, que motivou a adopción das medidas preventivas por parte do Ministerio aplicables en todo o territorio español desde o 12 de novembro.
