A Consellería de Educación, Ciencia, Universidades e FP confirmou a recepción, o xoves pasado, dunha comunicación alertando dun posible caso de acoso a unha nena de 5 anos nun colexio de Vigo, o centro concertado Monterrey. Fontes do departamento autonómico explicaron que a Inspección Educativa está a supervisar a apertura, por parte do colexio, do correspondente protocolo de acoso escolar para investigar o caso e “avaliar a existencia ou non do mesmo”.
Os feitos denunciados refírense a unha situación de acoso sufrida por unha nena de Educación Infantil, por parte dalgúns compañeiros do centro máis maiores, xa de sexto de Educación primaria. A consellería reiterou a súa posición de “tolerancia cero” fronte a este tipo de condutas e apelou ao “compromiso colectivo” ante comportamentos “contrarios á convivencia”, para seguir actuando “con eficacia e dilixencia” ante calquera caso.
Así mesmo, lembrou que os centros galegos contan con protocolos para intervir, uns protocolos que, segundo se indica aos colexios, deben abrirse “ante a mínima sospeita” para investigar. Ademais, este curso Educación puxo en marcha o Termómetro de Acoso Escolar, “que se suma a outras medidas como os Puntos Laranxa e o reforzo da formación do profesorado”.
