O BNG e o PP de Vigo pediron este luns unha alternativa para as 21 persoas ameazadas de desaloxo polo peche da pensión Nuestra Señora del Carmen. Nun comunicado, os nacionalistas lamentaron a “violencia institucional” do Concello e da Xunta contra estes inquilinos en “situación de vulnerabilidade social”, urxindo solucións a ambas as administracións.
“É unha tomadura de pelo que a única opción que lles ofrecen é buscar un aluguer nunha cidade con prezos imposibles por enriba dos 700 euros mensuais de media“, apostilou o portavoz do Bloque vigués, Xabier Pérez Igrexas. Tras reunirse con persoas afectadas e representantes da Federación Veciñal Eduardo Chao (Favec), Igrexas tachou de “indecente” a “inacción” tanto da Xunta como do Concello ante unhas persoas “sen apenas ingresos” que “van acabar na rúa a final de ano”. “Onde van atopar aluguer? Como van poder afrontalo?” cuestionouse, apuntando cara á “emerxencia habitacional” que vive a cidade.
Pola súa banda, o PP de Vigo lembrou que a principios deste mes reuniuse con persoas afectadas polo peche desta pensión, indicando que solicitou solucións ao goberno local. “Vaia por diante que non queremos xerar ningún conflito nin abrir unha fronte política en temas tan delicados como este, pero as persoas afectadas polo peche da pensión necesitan un reacollo canto antes. Pedíronnos unha reunión, escoitámoslles como procedía e, desde o noso punto de vista, o Concello de Vigo debe ofrecerlles algún tipo de amparo”, destacaron desde o PP, engadindo que coñecen que Política Social está a valorar a situación, esperando que se alcance unha solución canto antes.
CONCELLO
Pola súa banda, a concelleira de Política Social, Yolanda Aguiar, reivindicou que o seu departamento xa traballa de forma “individualizada” con cada afectado para buscar solucións, indicando que o Concello dispón de mecanismos para sufragar seguros ou as primeiras mensualidades cando se atopen solucións habitacionais para estas persoas. Aguiar aproveitou para lamentar que BNG e PP pretendan “sacar rédito político” da situación de “emerxencia social” que viven estas persoas, instando aos ‘populares’ a pedir tamén á Xunta que busque alternativas para os afectados. A concelleira tamén cargou contra a asociación de veciños, que “sempre que ten ocasión revictimiza e estigmatiza ás persoas vulnerables co único fin de tentar atacar ao goberno municipal”.
