A Sala do Civil e Penal do Tribunal Superior de Xustiza de Galicia (TSXG) confirmou a absolución dun home acusado de abusar sexualmente do seu fillo de 10 anos en Vigo.

Así, o alto tribunal galego considerou que a proba de cargo “non é suficiente” para “disipar con eficacia as dúbidas sobre a culpabilidade do investigado”.

O TSXG sinala que, aínda que a declaración é “clara”, “non significa que haxa de ser dada por certa e moito menos que por si mesma, sen maiores elementos de corroboración, haxa de servir como proba de cargo suficiente para crebar a presunción de inocencia do acusado”.

Os feitos tiveron lugar o 12 de setembro de 2022, cando o neno tiña 10 anos e acudiu a ver ao seu pai, cumprindo co réxime de visitas pactado. Tras iso, o neno contou á súa nai que o acusado, cando estaban tombados na cama vendo a televisión, e nalgunhas ocasións ao espertarse polas mañás ou ao ir deitarse, metíalle man por dentro do pantalón e o calzón, tocándolle as nádegas e o pene. O neno dicíalle que parase ante o que o pai contestaba rindo “que pasa, rapaz”.