O alcalde de Vigo, Abel Caballero, afeou este luns ao presidente da Xunta, Alfonso Rueda, que non estivese na cidade durante a celebración da Feira Conxemar (o titular do Executivo tomouse uns días de descanso nesa semana) e volveu reclamar ao goberno galego a ampliación do Instituto Feiral de Vigo, Ifevi, para que esta cita poida seguir crecendo e consolidándose. En declaracións remitidas aos medios, o rexedor lembrou que, un ano máis, Conxemar foi un éxito, e confírmase como “a feira máis importante de Galicia”. A pesar diso, e a pesar da presenza do ministro de Agricultura, Pesca e Alimentación ou a secretaria xeral de Pesca, entre outras autoridades, “o presidente da Xunta non se dignou” a acudir.
“Non estivo aquí, por que? Porque parece que non lle gusta Conxemar”, proclamou, e engadiu que o goberno galego “non quere ampliar o Ifevi”. “Quérolle lembrar que Conxemar é unha peza moi cobizada”, apuntou, en alusión ao intento de levar a feira fóra de Vigo. Para que Conxemar siga na cidade, engadiu, é “necesaria e obrigatoria” a ampliación do recinto feiral. Nese sentido, Caballero lembrou que enviou unha carta a Rueda hai meses para instarlle a facer unha valoración dos activos do Ifevi, como paso previo á entrada da Zona Franca no padroado e a estruturar a toma de decisións.
Así, o alcalde insistiu en que sería Zona Franca a que sufragase a ampliación, aínda que a “obrigación” sexa da Xunta, pero o goberno galego “non quere facer a valoración dos activos” e sen ela “non se pode investir desde Zona Franca”, porque o organismo estatal “ten que entrar como socio e como patrón no novo padroado”. “Por que non quere facer a valoración? Por que non quere que se amplíe o Ifevi? Por que non quere que Zona Franca pague e estamos dispostos a pagalo, sendo obrigación de Rueda, esa ampliación que se pode ir a 18 ou 20 millóns de euros? Porque eu empezo a sospeitar que Rueda quere que Conxemar se vaia de Vigo“, sentenciou Caballero.
A XUNTA APELA AO PREACORDO DE 2024
Pola súa banda, cuestionado acerca disto, o presidente da Xunta, Alfonso Rueda, lembrou que existía un preacordo alcanzado en novembro do ano pasado co Concello e con Zona Franca, e que agora o alcalde “descólgase con outra proposta”. En declaracións aos medios durante a rolda de prensa posterior ao Consello da Xunta, Rueda referiuse a esta cuestión como unha nova “polémica estéril” provocada polo rexedor vigués, para seguir aprazando a ampliación. “Cando ve que se pode chegar a un acordo, sempre busca unha escusa para que isto non sexa realidade”, afirmou o presidente galego.
Respecto diso, advertiu de que a Xunta non entrará “nese xogo”, e puxo como exemplo a construción das residencias de maiores financiadas pola Fundación Amancio Ortega. Segundo lembrou, o goberno autonómico chegou a acordos con todos os concellos, de diferentes cores políticas, e agora vaise a recibir a quinta residencia, mentres que a Ourense está a piques de terminar a súa construción. “En Vigo non fomos capaces nin de empezar. Por tanto, é a tónica diaria. Acordos con todos os concellos de diferentes cores políticas. En Vigo, imposible facer nada“, lamentou, antes de insistir en que prefire “evitar polémicas” e “tentar chegar a acordos” en beneficio dos cidadáns. “Se outros teñen outro tipo de tácticas, comigo que non conten”, sentenciou.
