A Corporación viguesa, encabezada polo alcalde Abel Caballero, xunto a sindicatos, asociacións e outros colectivos, conmemorou este mércores os 89 anos dos fusilamentos dos alcaldes de Vigo e Lavadores, Emilio Martínez Garrido e José Antela Conde, a mans do franquismo. O acto, celebrado no Xardín da Memoria do Cemiterio de Pereiró, incluíu a tradicional ofrenda floral e serviu tamén para lembrar a outros políticos e sindicalistas represaliados, como Ubaldo Gil, Heraclio Botana, Ramón González Brunet, Ignacio Seoane, Apolinar Torres e Demetrio Bilbatúa.

Durante a homenaxe, Caballero proclamou que se trata dun recoñecemento “a aqueles homes que tiñan un soño de democracia e de liberdade”, truncado pola represión fascista. O rexedor puxo en valor a ampla representación institucional e social presente no acto, entre eles o subdelegado do Goberno, Abel Losada, e o secretario xeral do PSdeG en Pontevedra, David Regades. Ademais, subliñou que esta lembranza é tamén unha defensa da democracia, tanto desde o goberno como desde a oposición, e un compromiso cos valores de progreso compartido.

O alcalde advertiu, con todo, de que os ideais de liberdade seguen a estar ameazados en España e no mundo, en tempos que cualificou de “convulsos”. Referiuse a líderes internacionais cuxas prácticas recordan a etapas de recorte de dereitos e lembrou que, fronte a esas tendencias, a resposta debe chegar desde a democracia, a Constitución e os valores cidadáns.