O alcalde de Vigo, Abel Caballero, anunciou que a xunta de goberno local aprobou este venres a programación do Nadal 2025-2026 da cidade, que contará con 11,5 millóns de luces LED e novos espazos adornados. Nun audio enviado aos medios de comunicación, o rexedor subliñou que se manterán as zonas xa iluminadas en ocasións anteriores e agregaranse máis. Isto permitirá, segundo dixo, dispor de máis espazo para veciños e visitantes.
Ademais, Caballero destacou que se mellorará o tráfico e prestarase especial atención aos niveis de ruído. “Volveremos ser o centro de atención do mundo. Cando Vigo acende as luces, se enciente o Nadal en todo o planeta”, insistiu. “O Nadal é unha marca da cidade. Gústanos aos vigueses, recibimos millóns de visitas e ten impacto na nosa economía”, reivindicou o alcalde, que tamén apuntou que se mellorará a recollida de residuos e instalaranse sistemas de información en tempo real para coñecer o tempo de espera nas atraccións.
Este ano, o Nadal de Vigo contará con máis de 11,5 millóns de luces LED en 420 rúas e prazas da cidade. Haberá 1.161 arcos ornamentais, 2.883 motivos e 2.667 árbores iluminadas, ademais da gran árbore de Porta do Sol. Tamén contará con máis de 50 unidades de elementos lumínicos 3D duns 3 metros de altura, un Belén Monumental na Casa das Artes, entre outros elementos. Pola súa banda, a Praza de Compostela e os xardíns de González de Haz volverán acoller o Cíes Market e as atraccións recreativas.
BNG
Tras este anuncio, o portavoz municipal do BNG, Xabier Pérez Igrexas, pediu ao goberno local que avance cara a un Nadal “descentralizado, racional, sustentable e respectuoso”. Nun comunicado, o Bloque lamentou que Caballero faga “oídos xordos” ás críticas e “non corrixa os erros” de edicións anteriores, “convertendo a cidade nun parque temático inhabitable e inseguro” durante as festas. “O Concello opta por un modelo centrado na imaxe e no autobombo, sen vontade de abordar os problemas reais”, criticou Igrexas, que instou a adoptar medidas urxentes para evitar que o Nadal volva ser un “caos”.
