O BNG de Vigo alertou de que o servizo de bus urbano de Vigo está nun “limbo” a días de que finalice a actual concesión de Vitrasa o próximo 7 de xuño. Nun comunicado, os nacionalistas demandaron ao goberno local información e “transparencia” sobre a prórroga que avanzou o alcalde, Abel Caballero, da que “non consta tramitación en curso”. O portavoz nacionalista, Xabier Pérez Igrexas, denunciou a “absoluta falta de información” sobre o futuro deste servizo municipal “máis aló das declaracións xenéricas de Caballero”.
Igrexas insistiu na “enorme oportunidade histórica” que se presenta co fin da concesión de Vitrasa, volvendo propor a creación dunha empresa municipal de transportes que permita a remunicipalización do servizo. “Temos nas nosas mans evitar que se hipoteque 10 anos máis a cidade cun modelo de transporte privatizado e insuficiente”, defendeu o Bloque, subliñado que o actual servizo é un “pésimo negocio para o interese público, cuxa única beneficiaria foi a empresa concesionaria”.
