O alcalde de Vigo, Abel Caballero, anunciou que o Concello xa permite o baño en todas as súas praias excepto na Foz tras a parada temporal da depuradora durante o apagamento eléctrico. Segundo informou o rexedor o pasado martes, a depuradora “aliviou” no mar durante unhas horas polo parón, provocando que as analíticas das augas viguesas rexistrasen cifras por enriba do normal, podendo haber bacterias contaminantes.
Por iso, o goberno local prohibiu o baño nas praias ata este xoves, cando as analíticas confirmaron que todas as praias están en “magnífico estado” para poder ser utilizadas, segundo Caballero. Todas elas excepto A Foz, o areal canino situado do outro lado de Lagares en Samil, onde por agora non se recomenda o baño “ata novo aviso”.
