Os concellos en Galicia póñense en marcha para facer fronte á situación de emerxencia xerada polo apagamento. Vigo, A Coruña e Santiago piden evitar desprazamentos en vehículos e en todos os casos reforzaron a presenza dos efectivos municipais para garantir a maior seguridade.

En Vigo, Abel Caballero trasladou que están a avaliar “o estado da cidade”, á vez que suspenderon toda actividade nas instalacións municipais. “O mellor, na medida do posible, é permanecer en casa para facilitar o eventual movemento do tráfico dos servizos de emerxencia, así como extremar a prudencia na circulación”, pide o consistorio da cidade olívica. Ademais, o PP e BNG puxéronse ao dispor do Goberno local; incluso o grupo nacionalista pediu que se active o Plan de emerxencias municipal.