A sección quinta da Audiencia Provincial de Pontevedra, con sede en Vigo, acolleu este mércores un xuízo contra un home, A.V.E., acusado dun delito de agresión sexual, e que se enfronta a 10 anos de prisión. A muller que o denunciou reafirmouse ante o plenario na súa acusación, mentres que o procesado asegurou que os feitos foron consentidos.

No seu interrogatorio ante o tribunal, A.V.E. explicou que coñecera á muller mediante a aplicación de citas Tinder e que falaban esporadicamente por redes sociais, chegando a ter unha cita presencial a finais do verán de 2021.

Meses despois, volveron citarse, na noite do 31 de maio de 2022, e el levouna a casa da súa nai en Vigo, onde non había ninguén. Segundo o seu relato, estiveron “a charlar” e vendo un partido de tenis pola televisión, e pouco despois empezaron “un tonteo”, a acariñarse mutuamente no sofá do salón.

A continuación, ela practicoulle unha felación e logo fóronse ao cuarto de baño, onde tentaron manter relacións sexuais por vía anal, sen conseguilo debido á dor dela. Alí, volveron ter sexo oral.

Posteriormente, o acusado acompañouna de regreso ao momento onde se citaron, preto da vivenda familiar e, tal e como asegurou, “en ningún momento” percibiu que a muller estivese a contragusto, nin chorando. Así, subliñou que todo o que ocorreu foi “consentido”, nun ambiente de intimidade buscado polos dous, e negou que a agrediu ou obrigado a facer algo que ela non quixese.

Finalmente, sinalou que, cando se despediron, el foi un pouco “seco” e quizá a moza quedou “desilusionada” porque esperaba “algo máis”.

“EU NON TEÑO QUE SENTIR NINGUNHA VERGOÑA”

Pola súa banda, a denunciante declarou sen contacto visual co acusado, que estivo separado do resto da sala por un biombo, e manifestou que, efectivamente, coñeceu a A.V.E. por Tinder, e que falaran previamente por redes sociais e tido unha cita, na que estiveron a tomar algo nunha cafetaría de Vigo, sen máis interacción.

A noite dos feitos, a muller quedou con el e acompañouno á casa familiar porque “ían tomar unhas cervexas e ver un partido de tenis”. Pero nada máis chegar e sentar no sofá, explicou, el agarrouna fortemente polo pescozo, obrigouna a practicarlle unha felación mentres a suxeitaba polo pelo, e deulle unha labazada.

Nun momento determinado, e para tratar de disuadilo de que fose máis aló, a moza díxolle que tiña a menstruación, e entón el levouna ata o baño agarrándoa polo cabelo. A muller afirmou que nada do que ocorreu no baño foi consentido e que ela chegou mesmo a pensar que se afogaría porque non podía respirar. Despois de que el exaculara, afirmou, achegouse a ela para explicarlle que o que pasara era o “rollo” que a el lle gustaba, e ela quedou no baño “tremendo e chorando”.

Segundo relatou, pasou “moito medo”, e quedou “en shock”, por iso non tentou fuxir nin chamar a ninguén nese momento. Mentres se vestían e saían do domicilio, explicou, o acusado preguntoulle varias veces se estaba ben, pero matizou: “Non lle preocupaba o meu benestar, parecía como unha ameaza, preocupáballe que eu non fóra a dicir nada”.

A moza recoñeceu que, aínda despois de contar todo aos seus amigos, e logo á súa nai, foi remisa a denunciar, porque temía represalias por parte do acusado e non quería revivir o sucedido. “Eu quería esquecer e pasar páxina”, explicou e, ao ser cuestionada sobre se lle daba vergoña denunciar, proclamou: “Eu non teño que sentir ningunha vergoña”.

A denunciante explicou que, no momento dos feitos, estaba a preparar un Traballo de Fin de Máster e unhas oposicións, e que o episodio vivido truncou a súa carreira e os seus plans. De feito, confirmou que segue en tratamento psicolóxico. “Levo 3 anos en que son outra persoa, non puiden seguir coa miña vida”, lamentou.

Este martes declararon ante o tribunal varios amigos da vítima, que corroboraron que a muller lles contactou en canto chegou a casa para explicar que vivira un “horror”, e que tiveron que convencela para ir ao hospital e logo para denunciar, porque ela “tiña moito medo do que el puidese facerlle”.

Tanto a Fiscalía como a acusación particular consideran ao procesado autor dun delito de agresión sexual, e piden que sexa condenado a 10 anos de prisión. A defensa reclama a libre absolución.