Especialistas do grupo de investigación Evolución Molecular Computacional do Centro de Investigación en Nanomateriais e Biomedicina da Universidade de Vigo (CINBIO) estudan a evolución de proteínas de virus que son diana de terapias antirretrovirais. Segundo recolle o Diario da Universidade (DUVI), estas proteínas poderían usarse para o desenvolvemento de novas vacinas e tratamentos, polo que o grupo, dirixido polo profesor titular Miguel Areas Busto, conta cunha axuda de 125.000 euros do Ministerio de Ciencia, Innovación e Universidades.

Así, terán tres anos para conseguir aplicar modelos avanzados de evolución molecular á predición da evolución de distintas proteínas de virus. “O obxectivo é desenvolver modelos biofísicos de evolución da secuencia, estrutura e función das proteínas e explorar as súas aplicacións técnicas e prácticas, con especial interese nas proteínas de virus que son diana de terapias”, indicou Areas.

O responsable do proxecto fai fincapé en que comprender a evolución das proteínas é “fundamental” para mellorar os métodos de predición da evolución das mesmas, os cales presentan aplicacións en diversos ámbitos, incluíndo biomedicina e biotecnoloxía. “Para realizar predicións de evolución de proteínas requírense modelos evolutivos e cando maior exactitude teñen estes modelos máis realistas serán as predicións correspondentes”, recalcou Areas.