O BNG de Vigo pediu ao Concello que adiante a marzo a convocatoria das axudas para libros e para o comedor escolar co obxectivo de que estean dispoñibles ao comezo de curso e non en “decembro ou xaneiro” como ocorreu nos últimos anos.
Nun comunicado, o portavoz municipal do BNG, Xabier Pérez Igrexas, avanzou que trasladará esta solicitude nas próximas comisións informativas do pleno local para garantir que no inicio do curso escolar “todas as familias coñezan se van recibir ou non esta axuda esencial para ao redor de 4.000 fogares de Vigo”.
“Non hai escusas para que se volva a repetir a situación delirante vivida nos últimos cursos, nos que as axudas acabaron resolvéndose entre decembro e xaneiro”, lamentou Igrexas, acusando o goberno municipal de provocar unha “innecesaria angustia” ás familias, facendo que algunhas decidisen non levar aos seus nenos ao comedor pola “incerteza” de non saber se terían bolsa ou non.
Todo iso, segundo os nacionalistas, pola “falta de xestión” do alcalde, Abel Caballero, que obrigou nalgúns casos ás asociacións de nais e pais a anticipar estas bolsas cos seus propios recursos.
“Unha administración como o Concello de Vigo, que conta cun orzamento ordinario de máis de 300 millóns de euros, ten os medios e as capacidades necesarias para compasar a convocatoria destas axudas ao propio proceso de matriculación, como recomenda o propio sentido común”, sentenciou.
GOBERNO LOCAL
Ante estas críticas, a concelleira de Benestar Social do Concello de Vigo, Yolanda Aguiar, mandou unha mensaxe de “tranquilidade” aos cidadáns, asegurando que as bolsas de comedor van estar en “tempo e forma” e estarán resoltas “antes de que comece o próximo curso escolar”.
Así saíu ao paso nun audio enviado aos medios de comunicación, lembrando ao Bloque que cando gobernaba en Vigo “non existían as bolsas de comedor”. Ademais, reivindicou que a materia “exclusiva” en educación é da Xunta de Galicia.
Todo iso despois de varios anos de queixas por parte de asociacións de nais e pais de Vigo pola tardanza das bolsas de comedor do Concello de Vigo, que se resolven xa ben empezado o curso escolar. Segundo lamentan, isto fai que moitas familias teñan que pagar a comida dos seus fillos durante ese período ou non os envían ao comedor por non poder abonalo.
En ocasións, son as ANPAS as que financian os comedores ata a chegada das axudas, a pesar de que, segundo reivindican, o curso todos os anos empeza en setembro e debería adaptarse a convocatoria para estar dispoñible ese mes.
