O Concello de Redondela demandou este luns unha “xestión directa” da Illa de San Simón ante a “inacción” da Xunta de Galicia.

Nun comunicado, a concelleira de Turismo, Rita Pérez, expresou o “profundo malestar” que existe entre os axentes turísticos e no goberno local, xa que desde que a illa pasou a formar parte da Fundación Museo do Mar de Galicia “os trámites para solicitar visitas complicáronse e demóranse semanas”.

Precisamente esta mañá Pérez reuniuse con empresarios do sector para valorar o potencial do turismo cultural de Redondela, onde coincidiron no “gran potencial” da enseada e da Illa de San Simón, sendo “a gran xoia de Redondela e de toda a ría de Vigo”, polo que “hai que pola en valor”.

O Concello asegurou que o principal problema é a “complexidade” para poder xestionar visitas á illa, despois de que en 2022 pasase a formar parte da Fundación.

“Desde entón, os trámites complicáronse e demóranse durante semanas”, insistiu Pérez, expresando o “profundo malestar” do sector, que ten “moitas dificultades” para organizar actividades alí.