A Fiscalía pide dous anos de cárcere e retirada do permiso de conducir por 4 anos, para un mozo que embestiu a unha motorista en xullo de 2023, ao invadir o carril contrario na estrada PO-552, á altura da parroquia de Coruxo en Vigo. Segundo figura no escrito de acusación pública, o condutor, que será xulgado este xoves na sala do Penal 2 da cidade olívica, circulaba por esa estrada, onde a velocidade está limitada a 70 quilómetros de por hora, en dirección Vigo.
Ao chegar a un recta no punto quilométrico 3.500, o condutor comezou a invadir de forma lenta e paulatina, a unha velocidade constante duns 70 quilómetros por hora. En dirección contraria circulaba unha motorista que, ao ver o coche, tentou frear e virar á esquerda, pero que non puido evitar o impacto, falecendo no lugar. O Fiscal expón que o mozo, que obtivera o permiso de conducir só uns días antes, non realizou manobra algunha para evitar a colisión.
“MENTIU DELIBERADAMENTE”
O acusado estaba diagnosticado de TDAH, e tiña pautada unha medicación, con todo, no exame psicotécnico para a obtención do carné ocultou este dato. Así, “mentiu deliberadamente” e negou ter diagnosticada enfermidade algunha ou consumir medicación psicoactiva. Todo iso, a pesar de que o seu psiquiatra lle advertiu da incidencia da medicación nas análises de tóxicos. De feito, as probas que realizaron tras o accidente deron positivo en anfetaminas.
DELITO E PENA
A Fiscalía considera ao mozo autor dun delito de homicidio por imprudencia grave, e pide que sexa condenado a 2 anos de prisión e que se lle retire o carné por 4 anos. Así mesmo, solicita que o procesado e a compañía aseguradora do coche indemnicen solidariamente aos pais, irmán e parella da vítima con cantidades que suman máis de 200.000 euros.
