A sección quinta da Audiencia Provincial de Pontevedra, con sede en Vigo, desestimou un recurso de apelación e confirmou a condena a dous menores de idade como autores dun delito de revelación de segredos, por difundir un vídeo de contido sexual doutro menor.

Na súa resolución, do pasado mes de xuño, o tribunal provincial ratifica a sentenza emitida polo Xulgado de Menores 1 de Pontevedra, que impuxo a un dos procesados a medida de liberdade vixiada por un tempo de 6 meses, coa obrigación de asistir a un taller de educación afectivo sexual e habilidades sociais (fomento da empatía e respecto entre iguais). O outro menor foi condenado a participar durante 4 meses en tarefas socioeducativas encamiñadas a previr os riscos asociados ao ‘sexting’ e sobre o uso responsable de novas tecnoloxías.

Ambos, e solidariamente os seus pais, deberán indemnizar á vítima, outro mozo menor de idade, en 1.000 euros máis intereses, polos danos morais, xa que o mozo sufriu unha situación de malestar emocional polas “mofas” e “burlas” das que foi obxecto.

Segundo se recólle na sentenza, os feitos ocorreron en abril de 2021, cando un dos acusados conseguiu un vídeo no que se vía á vítima masturbándose. O procesado ensinou o vídeo a outros menores nun parque e tamén no instituto (onde a vítima estudaba), ademais envioullo ao outro menor acusado que, igualmente, exhibiuno.

Cando os feitos transcenderon, o centro activou o protocolo de prevención do acoso escolar e expedientou ao mozo que iniciou os feitos, que estivo privado de acudir a clase durante un mes.