O Ministerio de Agricultura, Pesca e Alimentación e o Instituto Español de Oceanografía (IEO) iniciaron unha nova campaña para estudar os recursos pesqueiros e a caracterización do medio na plataforma continental de Galicia e a cornixa Cantábrica.

Realizarase ao longo de cinco sectores, desde a desembocadura do Miño á do Bidasoa. Para iso, un equipo científico do IEO parte hoxe do porto de Vigo a bordo do buque oceanográfico Miguel Oliver, do Ministerio de Agricultura, Pesca e Alimentación. Trátase dunha nova edición da campaña ‘Demersales’, que durará 35 días e finalizará no porto de Santander o próximo día 24 de outubro.

Os estudos permitirán continuar coa serie de datos recompilados sobre os índices de abundancia das principais especies pesqueiras. Tamén se recollerá información sobre os patróns de distribución espacial da fauna bentónica e demersal, a caracterización hidrográfica e sedimentolóxica da zona e a súa influencia sobre as especies identificadas.

Esta campaña multidisciplinar combina as mostraxes por arrastre de fondo para a avaliación das especies de peixes, crustáceos e cefalópodos, coa toma de datos e mostras biolóxicas mediante dragas de sedimento para a caracterización de fondos, e o uso de batisondas CTD para obter datos da columna de auga.

Ademais, realizaranse estudos de alimentación das distintas especies, censo de aves e a súa relación coas especies descartadas, recollida de mostras biolóxicas para estudos de contaminación, marcado de quenllas e raias, e o seguimento dos arrecifes artificiais do Cantábrico, entre outros.