Un grupo de traballadores do transporte sanitario hospitalario (non urxente) concentrouse este luns ás portas do Hospital Nicolás Peña de Vigo para volver denunciar a “precariedade” de medios coa que teñen que desenvolver o seu traballo. Segundo sinalaron os sindicatos CIG, CC.OO. e USO, a pesar das advertencias e avisos ao Sergas e á área sanitaria de Vigo, persisten problemas como falta de subministracións funxibles, problemas de respostos para os desfibriladores, problemas cos traxes EPI, etc., aos que se suman ambulancias en mal estado de mantemento. Os sindicatos lamentaron que Sanidade fai oídos xordos ás súas reclamacións, e denunciaron que esta “precariedade de medios” repercute na seguridade dos traballadores, pero sobre todo na atención que presta aos enfermos.