O secretario de Estado de Transportes e Mobilidade Sustentable, José Antonio Santano, reuniuse na tarde deste luns co alcalde de Vigo, Abel Caballero, nun encontro no que dixo “si a todo” para a cidade, prevendo comezar as obras do Saída Sur ferroviaria en 2029. Así o sinalou o propio Santano nunha comparecencia ante os medios de comunicación tras a cita, que se levou a cabo na sede do Concello durante máis de dúas horas. Alí, despois de recoñecer o seu coñecemento da cidade olívica debido a que a súa muller traballou durante moitos anos nela, o secretario de Estado relatou os distintos temas tratados co rexedor, ao ser “asuntos pendentes” do Goberno coa urbe.

En primeiro lugar, falou de todo o relativo ao ferrocarril, lembrando que o Ministerio traballa nun estudo informativo complementario para a variante de Cerdedo, co obxectivo de que Vigo teña AVE directo a Madrid sen pasar por Santiago. A pesar de todo, non deu datas de cando podería estar esta infraestrutura, asegurando que “o importante é non parar e ir avanzando”.

Outro dos puntos tratados foi a conexión ferroviaria da cidade con Porto (Portugal), explicando o compromiso de ambos os gobernos por esta vía. Respecto diso, dixo que o estudo informativo do Saída Sur de Vigo estará listo para o primeiro trimestre de 2025, prevendo que, tras varios trámites máis, as obras poidan comezar en 2029. Ademais, o Ministerio tamén traballa para licitar o estudo do tramo entre O Porriño e a fronteira portuguesa, segundo engadiu.

Entre outros temas, Santano referiuse a a reforma da Avenida de Madrid, debido a que dous terzos da mesma serán financiados polo Executivo central e o goberno local encargarase de licitar a obra. Sobre o túnel da A-52, para que Vigo dispoña de autovía directa a Madrid, o secretario de Estado insistiu no compromiso do Goberno de levalo a cabo, lembrando que se calcula un investimento duns 350 millóns de euros.

“Díxenlle ao alcalde que hai moi poucas cidades ás que eu haxa ido nestes meses que levo sendo secretario de Estado que lle dixemos si a todo. O Goberno de España ten un compromiso con Vigo entendendo que esta é unha cidade que tiña demasiadas tarefas pendentes”, sentenciou.