Os sindicatos CC.OO., UXT e SICO deron a coñecer este luns un “acordo histórico” pechado a pasada semana co goberno municipal de Vigo para ampliar o persoal do servizo de Bombeiros da cidade, e implementar outras melloras para o persoal deste servizo. Segundo figura no comunicado remitido aos medios polo tres sindicatos, que agradeceron a “empatía e clara predisposición ao diálogo” das concelleiras Patricia Rodríguez e Olga Alonso, o acordo implicará “grandes beneficios” para o persoal de Bombeiros, e explicaron que devandito acordo tomou como base un acordo anterior, subscrito en agosto de 2020 por estes mesmos sindicatos e por CIG e CUT, que agora se desmarcan deste último pacto, aínda que foi “notoriamente mellorado”.

Así, entre as medidas pechadas co goberno local atópase a incorporación de “máis de 30 novas prazas de nova creación” para o servizo de Bombeiros para “dimensionar definitivamente o servizo, e de acordo ás previsións organizativas informadas pola propia Xefatura”. Igualmente, establécese unha xornada anual para estes traballadores de 1.642 horas, do mesmo xeito que os demais empregados públicos, de maneira que se suprimen as 219 “horas estruturais” existentes ata agora, sen que iso supoña unha minoración do complemento específico deste persoal.

Tamén se acordou modificar as regras de cálculo do valor das horas extraordinarias, para que se paguen igual que as horas ordinarias “como mínimo” (un compromiso do que se beneficiarán tamén o resto de traballadores do Concello). Mentres non se convoquen as novas prazas de Bombeiros, porase en marcha un “plan temporal de reforzos voluntarios” para garantir a seguridade pública e do propio persoal, e que haxa os efectivos necesarios en cada retén. Isto permitirá tamén que os bombeiros poidan exercer o seu dereito a vacacións e días de asuntos propios. A mesa de negociación tamén obtivo o “compromiso institucional” de “axilizar e priorizar a tramitación” das OPE que afecten o servizo de Bombeiros, e de pagar os emolumentos que se deben a este persoal.