A Xunta, a través da Fundación Pública Urxencias Sanitarias de Galicia-061, adxudicou o servizo de transporte sanitario urxente terrestre na área de Vigo á empresa UTE Emerxencias Sanitarias-Saluser 2024, un procedemento que se levou a cabo pola vía de urxencia e cuxo contrato entrará en vigor o 1 de xuño. Dado este sistema extraordinario, o novo contrato será polo prazo necesario para que a Consellería de Sanidade licite un novo contrato por procedemento aberto, inicialmente de seis meses aínda que con posibilidade de prórroga outros tres.

Deste xeito, a Xunta garante a prestación do servizo de transporte sanitario urxente terrestre na área de Vigo, que comprende os concellos de Vigo, Cangas do Morrazo e Moaña, “un servizo esencial para a poboación que debe seguir prestándose” despois de que a actual empresa concesionaria comunicase “a imposibilidade” de mantelo. O importe da adxudicación ascende a 2.901.947 euros e, de prorrogarse, está previsto un importe adicional de 1.380.169,82 euros.