Os problemas técnicos, concretamente de acústica, na macrosala da Cidade da Xustiza de Vigo impiden a continuación do xuízo polo alixo de cocaína incautado a bordo do buque MV Karar, en abril de 2020, e a vista sinalada para este xoves ás 10:00 horas non puido comezar. Estes problemas de reverberación e eco foron denunciados reiteradamente por avogados, fiscais e maxistrados, e a pesar dalgunhas melloras introducidas, a sala segue sendo inadecuada para a práctica dalgunhas probas. É o que ocorreu nas últimas horas co intento de reprodución dunhas gravacións realizadas a algúns acusados da causa do Karar.
Así, este mércores o Fiscal pediu reproducir durante o xuízo algunhas conversacións gravadas cun micrófono que fora colocado nun vehículo pero, o ruído ambiente da propia gravación e a mala acústica da macrosala imposibilitaron que puidesen escoitarse cunha mínima claridade. Precisamente por iso, a sala acordou suspender o xuízo e solicitar a asistencia técnica para liquidar o problema. A continuación estaba prevista para este xoves ás 10:00 horas pero as deficiencias seguían sen resolverse.
Ao longo da mañá, os técnicos estiveron facendo probas e, tal e como advertiran as propias maxistradas nas últimas horas, a falta doutra estancia alternativa en Vigo, non se descarta que as sesións se trasladen a dependencias xudiciais de Pontevedra. En Vigo, a macrosala da planta baixa é a única estancia con capacidade para albergar a todas as partes que participan neste xuízo: 28 acusados, unha decena de avogados defensores, fiscal, acusación particular e o propio tribunal.
